connestable

Connestable, par double et non par simple n, ne vient pas de Comes et Stabilis ou Stabulum comme aucuns pensent, ains de ce mot Allemant Connincstapel composé de ces deux Conninc qui signifie Roy, et stapel, qui signifie estay, appuy et soustenement, estant le Connestable en ce Royaume l'officier de la couronne de France auquel le Roy se repose des affaires d'icelle pour l'Estat et les armes. De ceste opinion est Beccan au 2. livre de sa gigantomachie disant, Stapel pedem et fulcrum significat, cui vel sedes vel aliud quidpiam innititur ac insistit, quasi Connincstapel, sta-behelt, id est statum conseruans diceretur: Connincstapel igitur columen et quasi fulcrum esse regiae maiestatis vox ipsa declarat. Et erat profecto tum temporis illa regibus Francorum viuendi consuetudo, vt illi qui hoc nomine vocabantur, statum regium conseruarent, quoniam penes eos esset totius gubernationis et imperij potestas. Ceste dignité n'est pas tenuë en si haut reng et lieu eminent en Espagne (où il est appelé Condestable) qu'elle est en France. Il se trouve en la Chambre des Comptes, en la layete cottée XIxxXV. dix sept quittances de Gaucher sieur de Chastillon Connestable de Champagne, du mariage de Marguerite de Valois fille de Charles de France Conte de Valois frere du Roy Philippe le Bel, marié à Guy de Chastillon Comte de Bloys. És lettres de la convocation des nobles de Normandie pour eux trouver à Reims au couronnement du Roy S. Louys, est nommé le Connestable de Normandie, le Chambellan et le Mareschal dudit Duché.

Thresor de la langue françoyse. Jean Nicot.